1Cor 16 | GbrGAW | STEP | Miɓa daɓo n saiye ntu agyi wye ɓo n fye ɓa yezhi fya ga Shekwoyi aza n ɓa fi n Yahudiya nyi. Tile nu fya zhin nya ma gna a ikklisiya Galatiya nya ge ɓa zhin nyi.

1 Corinthians 16

Zokwo Wu Kmaknayi

1 Miɓa daɓo n saiye ntu agyi wye ɓo n fye ɓa yezhi fya ga Shekwoyi aza n ɓa fi n Yahudiya nyi. Tile nu fya zhin nya ma gna a ikklisiya Galatiya nya ge ɓa zhin nyi. 2 N Ladiwyi doho-dohoi yi, zaho-zahoi ɓa kni agyiwye shi wa bwa n sun, wa so ɓa zhi ntuge esa ma ɓe cei, fye ta shan zhi ge fye ye agyiwye ho zhi m. 3 Esa ma ɓe cei, mʼɓei tnu nazayi n fye ye cei, miye la wasika ma ɓa ɓa lo nfye nyaga yi n Urushelima. 4 Ndei ma gye ko bmiya lo ma lo ce to, sai ɓa gnilo n miyi.

5 Mʼɓei ɓe fya ba mi-i la zhi Makidoniya, ntuge mi ye ma vi Makidoniya bwa nu. 6 Mi gye lo ngye nʼɓei la mwasa fyewyi nfyaba, kpekni har ma zhin vinyiko vinya, ofye nu ɓei ka mi bma zhin har mi ye lo aba nʼɓei kalo. 7 Mi to cei pma lo ma gye fye mi-i duduyam, ama mi na wyetu yi lo ma sunsa fyewyi nfyaba, n Shekwoyi wa ye. 8 Ama mi ɓa dnaya n Afisus kpa har Pentikos sa. 9 Abokunmi guguyi yalo ya n mwa pata n maba ntu tnutnu ɓo, ama anuwunyi lo ce n mwa begye.

10 Ndei Timatiwus wa ɓe fye aba, to, sai fya gwo wo abwa-baba ntuge wo zhin tnu-tnu ga Shekwoyi nu shi mi gyi fye wye, omazaje, 11 fye zhin wyegbam, ama fye bma wo zhin ntuge wa gyi abye nwo zanyi har wa ɓe maba n bugbafuyi, ntuge mi shi wo ɓeɓe awye lo ɓedo nazaje yi. 12 To, ntu eyi zado ɓo ngye Apolos, ma ku wye gyi wo nmwa n nabai waɓe fyaba ngnisun nazaje yi, ama ko to lo wo do wa ɓe n saiye m. Ama esa wa bwa esa cei, wo ɓa ɓe.

13 Fye ku zhi gu, fye ku mizhi n gaiciya ga mi, fye ku edna ya, fye ku kala dna. 14 Fye zhin ɓoho-ɓohoi vinya dna ye-ye mi.

15 Fye kpelo ge Istifanus n wo puwa yi, ɓanu ɓei kmi Yesu vi nabye n Akaya, ɓai pmi ɓaku ɓahin tukwo ga ntu Shekwoyi aza bmazhin ɓo, mi gyi fye wye, mi azaje, 16 fye zhin ɓo nɓa gna fye ge fye zhin, fya vi azaje ɓo nɓa zhin tnu-tnu ngye ɓa. 17 Adamilo n mwa ntuge, Sitifanas, Fartinatus ɓedo n Akaikus ɓaku ɓe ma ba, ɓaku tnu-tnu zhin n fye ɓei ɓa zhin nyi. 18 Ɓala awyeko gyimi ɓai gami agmada she ɓa ɓei zhin fye nyi.

19 A ikklisiya vinya n Asiya kni ɓa safya milo. Akila n Biskila yi, ɓedo n ikklisiya yi n ko yezhi n ɓa puwa nyi, ɓa safya mi lo n mwa dna Dagayi. 20 Azaje vinya ɓa safye amilo. Fye ɓi azaje gna vinya n bwadodna gyi-gyi yi.

21 Mika deye n ma bwa yi nu. Omi, Bulus, mi ɓi fye gna lo. 22 Zaho-zahoi wo to ya Dagayi m, eknil tu lo n wo. Eyi Dagayi, ɓe. 23 Alheri Dagayi Yesu nya ko sase kunsun fye yi. 24 Omi ye-ye ko kun-sun nfyei vinya dna Yesu Kristi. Amin.